Imwe mu miryango itari iya Leta, ikora ubuvugizi ku mategeko agenga ubuzima, by’umwihariko ubuzima bw’imyororokere, irishimira ko ibigo nderabuzima byemerewe gutanga serivisi yo gukuriramo inda abagore babyemerewe n’amategeko kuko bizafasha mu gukumira ibibazo byaterwaga no kuzikuramo mu buryo butanoze (uburyo bwa magendu).
Mu mwaka wa 2018, mu itegeko ry’u Rwanda riteganya ibyaha n’ibihano muri rusange hashyizwemo ingingo ya 125 iteganya impamvu 5 zemerera umugore cg umukobwa kuba yakuramo inda mu buryo bwemewe.
Izo mpamvu ni igihe uwatewe inda ari umwana (ari munsi y’imyaka 18); uwafashwe ku ngufu; uwayitewen’uwo bafitanye isano kugera ku gisanira cya kabiri; uwayitewe nyuma yo kubanishwa n’umugabo ku gahato ndetse n’uwo abaganga bagaragaje ko inda atwite ibangamiye ubuzima bwe cg ubw’umwana atwite.
Cyakora, iteka rya Minisitiri w’Ubuzima riteganya ibigomba kubahirizwa mbere yo gutanga iyo serivisi, ryagenaga ko itangirwa ku kigo cy’ubuvuzi cya Leta cyangwa icyigenga kiri ku rwego rw’ibitaro cyangwa urwa polikilinike.
Iyi ni ingingo yariteje imbogamizi, nk’uko bishimangirwa n’Umuryango HDI [Health Development Initiative] ndetse na Réseau des Femmes.
Sengoga Christopher, Umuyobozi muri HDI, Ushinzwe ibikorwa by’Ubuvugizi n’Uburenganzi ku buzima yagize ati “Byagiye biba imbogamizi kenshi kuko ubuvuzi usanga mu Rwanda umuturage ahera ku kigo nderabuzima.”
Uwimana Xaverine, Umuyobozi wa Réseau des Femmes na we yagiz ati “Kugira ngo uwo muntu ukeneye iyo serivisi azagere ku bitaro, ari bimwe mu karere, kandi muzi uko akarere kangana, wasangaga ari imbogamizi.”
Uretse kuba ibyo bitaro ubwabyo byari bike, muri byo harimo n’iby’abihaye Imana bitemera gutanga serivisi yo gukuriramo umuntu inda.
Nyuma y’ubuvugizi bwakomeje gukorwa n’imiryango itari iya Leta, iyi ngingo yamaze guhindurwa ndetse kuri ubu ikigo nderabuzima cyemerewe gutanga serivisi yo gukuriramo umuntu inda, nk’uko bigenwa n’Iteka rya Minisitiri n° 002/moh/2024 ryo ku wa 29/11/2024 rigena ibigomba kubahirizwa kugira ngo muganga akuriremo umuntu inda.
Sengoga Christopher avuga ko nka HDI, iki ari icyemezo bishimiye. Ati “Twabyakiranye akanyamuneza kuko icyo tuba twifuza ni ubuzima bw’Abanyarwandakazi kuba bwabungwabungwa, bakabona serivisi kandi bakayibonera igihe, kandi bakayibona hafi yabo.”
Sengonga yongeraho ko “Ariko icyadushimishije cyane ni uko bizagabanya impfu n’ibikomere, n’ibibazo byose bizanwa no kuba abagore bikuyemo inda mu buryo butanoze.”
Uwimana Xaverine uyobora Réseau des Femmes na we avuga ko “Habayeho kuborohereza kugira ngo n’iyo serivisi bayibone hafi kandi bayihabwe nta mananiza.”
Xaverine kandi asaba abantu kwirinda gusama inda batifuza kuko ari byo biba intandaro yo kwifuza kuzikuramo.”Rwose turakangurira abantu kwirinda gusama inda batifza kuko kuzikuramo ntabwo ari umuti. Umuti wa mbere ni ukutazisama.”
Umwe mu bagore bigeze gusaba serivisi yo gukuramo inda bigikorerwa ku bitaro gusa, waganiriye na buzima.rw, na we ashimangira ko kwegerezwa iyi serivisi ari ingenzi. Yagize ati “Byaba ari byiza cyane kuko njye byari byangoye. Byantwaye amatike ashobora kuba agera mu 6,000FRW. Ku Kigo Nderabuzima ho nsanzwe njyayo n’amaguru.”
Ese Ibigo Nderabuzima byiteguye gute gutanga serivisi yo gukuriramo umuntu inda?
Batamugira Leonidas, Umuyobozi w’ Ikigo Nderabuzima cya Kinyinya, cyo mu murenge wa Kinyinya, mu karere ka Gasabo ashimangira ko kuri ubu ibigo nderabuzima bifite ubushobozi bwo gutanga serivisi yo gukuriramo umuntu inda kuko imbogamizi bari bafite, Minisiteri y’ubuzima yazivanyeho.
Yagize ati “Ni ukuvuga ngo kugira ngo iyo serivisi itangwe, hari ibinini baha umuntu ariko banamunyuza mu cyuma [Echography] ngo barebe neza ko mu nda nta kintu gisigayemo. Rero ni cyo cyaburaga ku bingo nderabuzima, ariko dushimire Minisiteri y’ubuzima yaje kuduha ibyo bikoresho.”
Leonidas avuga ko kandi hari abakozi bahuguwe gukoresha Echography ku buryo nta mbogamizi bagira. Ati “Ubu dufite abakozi babiri bahuguwe.” Ashimangira ko “Ubu ngubu ku kigo nderabuzima, umubyaza cyangwa umuforomo aba ashobora kunyuza umudamu muri Echography.”
Uyu muyobozi avuga ko igisigaye ari uguhugura abaforomo n’ababyaza ku bijyanye no gutanga serivisi yo gukuramo inda.
