Minisitiri w’Ubuzima Dr. Sabin Nsanzimana yatangaje ko kuri iki Cyumweru tariki 06 Ukwakira 2024, u Rwanda rutangira gukingira virusi ya Marburg, haherewe ku baganga n’abakora mu mavuriro.
Yabigarutseho mu kiganiro n’abanyamakuru cyabaye kuri iki Cyumweru, mu rwego rwo kubagaragariza uko viruis ya Marburg ihagaze mu Rwanda ndetse n’ibimaze gukorwa mu guhangana na yo no kuvura abanduye.
Minisitiri Sabin yavuze ko ejo hashize ari bwo babonye doze 700 z’urukingo rwa Marburg, bahawe n’Ikigo cya Amerika gishinzwe kurwanya indwara no gukumira ibyorezo (CDC).
Yahumurije kandi abaturage ko uru rukingo rwizewe kuko hari n’ahandi rwakoreshejwe. Yagize ati “Abantu ntibagire impungenge. Uru rukingo rwa Marburg rugiye gutangwa rwagiye rukoreshwa no mu bindi bihugu birimo Uganda, Kenya n’ahandi, kandi abaruhawe rwabagiriye akamaro.”
Uretse uru rukingo rugiye gufasha u Rwanda mu guhangana na virusi ya Marburg, Minisitiri w’ubuzima Dr. Sabin Nsanzimana yanavuze ko kugeza ubu hari imiti ibiri ifasha abarwayi iri gukoreshwa mu gihugu ari yo : Remdesivir na Monoclonal antibodies.
Minisiteri y’Ubuzima kandi ivuga ko yashyizeho ahantu ho gupimira virusi ya Marburg muri buri ntara, mu rwego rwo gufasha abantu kumenya uko bahagaze no kubona ibisubizo ku gihe.
Imibare ya Minisiteri y’ubuzima itangaza umunsi ku wundi, ijyanye n’uko virusi ya Marburg ihagaze, iheruka ya tariki 5 Ukwakira 2024, igaragaza ko mu Rwanda abantu 1748 bamaze gupimwa virusi ya Marburg. Muri abo, 46 basanze bafite iyi virusi.
Mu banduye Marburg, 12 yarabishe, batanu barakira mu gihe abandi 29 bari kuvurwa.
