Minisiteri y’ubuzima mu Rwanda (Minisante) ivuga ko kugeza ubu, ibipimo bibereka ko virusi ya Marburg itakwiriye mu gihugu.
Mu butumwa Minisante itanga buri munsi, bugaragaza uko icyorezo cya Marburg gihagaze mu gihugu, ubuheruka bwo ku mu goroba wo ku wa Kane tariki 10 Ukwakira 2024 harimo ko ‘Kuva hatangazwa ko indwara ya Marburg yageze mu gihugu, abarwayi bashya n’abo bahuye bagiye baboneka muri bimwe mu bitaro byo mu mujyi wa Kigali, bose bashyizwe mu kato kandi baritabwaho n’abaganga. Kugeza ubu, ibipimo bigaragaza ko iyi ndwara itakwiriye mu gihugu.’
Ubwo butumwa bugaragaza ko muri rusange kugera kuri iyo tariki abantu 2949 ari bo bari bamaze gupimwa virusi ya Marburg. Muri abo, 58 basanze bayirwaye.
Mu banduye virusi ya Marburg, 15 baracyize, 13 bicwa na yo, mu gihe 30 bari kuvurwa.
Kugeza ubu, ibikorwa byo guhangana n’iyi virusi birakomeje, birimo kuyipima, kuyikingira ndetse no kuvura abanduye
Virusi ya Marburg yagaragaye mu Rwanda tariki 27 Nzeri 2024. Kugeza ubu Minisiteri y’ubuzima iviga ko ikiri gukora igenzura ngo hamenyekane aho iyi virusi yaturutse. 
