Mu rwego rwo gukomeza gahunda yo gutuza neza abaturage, Umujyi wa Kigali watanze inzu nshya ku miryango 172 yatujwe mu Mudugudu wa Mpazi, mu Murenge wa Gitega.
Ubuyobozi bw’Umujyi wa Kigali bwashyikirije imiryango 172 imfunguzo z’inzu nshya 310, mu rwego rwo kuyifasha kubona icumbi ritekanye. Izi nzu ni igice kimwe cy’inyubako 688 zose zubatswe muri uwo mudugudu.
Mukamana Fausta, umwe mu bahawe inzu, yavuze ko yishimiye cyane kubona icumbi rishya nyuma y’igihe kinini atuyemo ahantu hatari heza. Yagize ati: “Nishimiye kubona aho kuba heza, nta kiguzi, mu mudugudu utunganye.”
Ubuyobozi bw’Umujyi wa Kigali buvuga ko izi nzu zubatswe ku butaka bwari busanzwe butuwemo n’abaturage, ariko bakodesherezwaga aho kwimukira mu gihe hatunganywa ibikorwa remezo. Inzu zahawe abari bafite ubutaka hagendewe ku igenagaciro ry’imitungo yabo, izisigaye zihabwa imiryango itishoboye.
Umuvugizi w’Umujyi wa Kigali, Emma Claudine Ntirenganya, yavuze ko abahawe izi nzu bubahirije ibisabwa birimo ibyangombwa by’inzego z’ibanze n’icyiciro cy’ubudehe. Yongeyeho ko umushinga uzakomeza mu bibanza biri hafi y’uwa Mpazi, mbere yo kwerekeza mu yindi midugudu nka Nyagatovu.
Izi nzu zatashywe uyu munsi zubatswe ku butaka bwari butuweho n’imiryango 111. Ahandi harimo ahubatswe agakiriro, isoko n’ibikorwaremezo bifasha abahatuye. Uyu mushinga ni igice cy’ishyirwa mu bikorwa rya gahunda y’imiturire iciriritse n’isuku mu mijyi.
