UBUHINDE Bwatangije igenzura ryihutirwa ku ndege za Boeing 787 nyuma y’impanuka ya Air India yahitanye abagera kuri 270
Guverinoma ya India yatangaje ko yatangije igenzura ryihutirwa ku ndege zose za Boeing 787 nyuma y’impanuka ikomeye y’indege ya Air India yabaye ku wa Kane, tariki ya 12 Kamena 2025, igahitana abantu barenga 270, mu gihe abandi barimo abari mu nyubako y’ishuri n’abo bari mu ndege bahasize ubuzima. Minisitiri w’Ubwikorezi bwo mu kirere, Ram Mohan Naidu, yavuze ko igenzura riri gukorwa ku ndege 34 zo mu gihugu zifite moteri za GEnx, zirimo 33 za Air India na imwe ya IndiGo. Kuva impanuka yabaho, indirimbo y’ubwoba n’amarira y’ibikomere yacitse mu gihugu cyose.
Minisitiri Naidu yavuze ko guverinoma yategetse isuzuma ryimbitse kuri izo ndege, harimo igenzura ry’ibipimo by’itangira ry’indege (take-off), isuzuma rya moteri, no kugenzura uburyo moteri zitanga ingufu. Yatangaje ko indenge umunani zamaze gusuzumwa kandi igenzura rizakomeza ku zindi zisigaye ku buryo bwihutirwa. Yagize ati: “Ibi ni ibikorwa by’ingenzi kugira ngo dushimangire umutekano kandi dusubize icyizere mu rwego rw’indege.”
Nubwo izo ndege zitarahagarikwa, hari amakuru avuga ko Leta ya India iri kwiga ku buryo bwo kuzihagarika mu gihe igenzura ryagaragaza ibibazo bikomeye. Iperereza ku byateye impanuka rirakomeje, aho hibandwa ku ngufu za moteri, ibipimo by’inyongera by’indege nk’ibyuma bigenzura imbaraga (flaps), n’impamvu amapine y’indege atafunze neza ubwo yateraga ikirere.
Indege yari itwaye abantu 242, yerekeza ku kibuga cy’indege cya Gatwick mu Bwongereza, ariko yatangiye kumanuka vuba nyuma yo guhaguruka, ikagwa ku nyubako y’amacumbi y’ishuri rya B.J. Medical College, igahita ifatwa n’inkongi. Kugeza ubu, imibiri irenga 270 imaze kuboneka, harimo iya benshi batari bamenyekana, kandi haracyakorwa isuzuma rya ADN n’ibipimo by’amenyo kugira ngo bamenyekane. Umuntu umwe gusa ni we warokotse, abandi bose bari mu ndege na bamwe mu bari mu nyubako bahasize ubuzima.
Iyi mpanuka yateye igikomere gikomeye ku isura ya Air India, cyane ko kuva yegurirwa na kompanyi ya Tata Group mu 2022, yageragezaga kongera kubaka izina ryayo no kongera ubushobozi bwayo. Umuyobozi wa Tata Group yavuze ko bakeneye kumenya icyateye iyi mpanuka, ati: “Ubu turacyibaza ibibazo byinshi kandi ntiturabona ibisubizo.”
Komisiyo y’iperereza yashyizweho na Leta izatanga raporo y’iperereza mu mezi atatu ari imbere. Minisitiri Naidu yavuze ko bazanoza umutekano ku buryo ntakizongera kubaho nk’ibi. Yirinze gusubiza ibibazo byinshi by’abanyamakuru, avuga ko hari icy’ingenzi bari gukora ari cyo iperereza ryimbitse.
Mu gihe umubare w’abapfuye ukomeza kwiyongera, imiryango y’ababuze ababo ikomeje gutegereza ibisubizo ku myirondoro y’imirambo iri i Ahmedabad. Abaganga barimo gukora amasaha y’ikirenga bagerageza gutoranya ibimenyetso bifatika byafasha mu kumenya abapfuye. Bamwe mu babyeyi bavuga ko batakaza icyizere kubera gutegereza igihe kirekire, bifuza kumenya aho abana babo bari n’igihe imibiri yabo izarekurwa. Abenshi mu bapfuye barahiye cyane ku buryo gusuzuma amenyo aribyo bizatuma bamenyekana. Umuganga umwe w’inzobere mu menyo, Jaishankar Pillai, yavuze ko bafite inyandiko z’amenyo za 135 mu bapfuye, kandi ko barimo kuzikoresha mu kubahuza n’amadosiye ya mbere.
N’abaganga bari ku bitaro by’iyo kaminuza nabo batangaje ko bibagoye kwakira urupfu rw’inshuti n’abakozi bagenzi babo. Umwe yagize ati: “Turimo gutakaza imbaraga zo kwihangana, twatakaje inshuti n’abakozi, turababaye cyane.”
