M23 yungutse abarwanyi bashya barenga 7,000 nyuma y’imyitozo i Rumangabo

Umuhango wo kwinjiza aba barwanyi mu gisirikare wabereye i Rumangabo ku wa 14 Nzeri 2025, witabirwa n’umuyobozi w’ihuriro  rya AFC, Corneille Nangaa Yobeluo, n’umuyobozi mukuru w’ingabo za M23, Gen Maj Sultani Makenga.

Umuvugizi wa AFC/M23, Lawrence Kanyuka, yatangaje ko aba barwanyi bashya barimo abahoze mu gisirikare cya Leta ya RDC ndetse n’abo mu mitwe igize ihuriro Wazalendo, biyunze kuri M23 ubwo yari imaze gufata imijyi irimo Goma na Bukavu mu ntangiriro za 2025.

Mu myitozo yo kubohora igihugu Mu ijambo rye, Gen Maj Makenga yasobanuriye abarwanyi bashya ko bahuguriwe kubohora igihugu cyabo, anashinja ubutegetsi bwa Perezida Félix Tshisekedi kwica abaturage, gusenya imidugudu no kudaha agaciro igisirikare cya RDC.

Yagize ati:
“Tshisekedi yangije byose, n’igisirikare yaragifashe akigira nk’ikimoteri. Yakivanze n’abaturage bitwa Wazalendo, akivanga na FDLR, Imbonerakure n’izindi ngabo z’amahanga. Umuyobozi udaha agaciro igisirikare ntakunda igihugu, ntakunda Abanye-Congo, ntakwiye kuyobora.”

Makenga yasabye abarwanyi bashya kurangwa n’imyitwarire myiza, gukunda abaturage no kubahisha igihugu cyabo, kuko ari bwo bazagera ku ntego zo “kubohora RDC”.

Mu ntangiriro za Nzeri 2025, Makenga yari yatangaje ko M23 ifite intego yo gufata imijyi ikomeye ya RDC irimo Kalemie (Tanganyika), Kisangani (Tshopo) na Kindu (Maniema).

Ku ruhande rwe, Corneille Nangaa, uyobora AFC, yamenyesheje abarwanyi bashya ko intego ya M23 itarangiye, kuko igamije no “kubohora” indi mijyi minini nka Lubumbashi (Haut-Katanga), Mbandaka (Équateur) ndetse n’umurwa mukuru wa RDC, Kinshasa.