Umutaliyani n’umuryango we bavuye muri Zambia bagera i Kigali n’amagare kwihera ijisho Shampiyona y’Isi

Umutaliyani utuye muri Zambia, Matteo Sametti, ari kumwe n’umuryango we, bakoze urugendo rw’amagare rwa kilometero zisaga 1500 bava i Kasama muri Zambia bagera i Kigali, aho bagiye kwitabira no kureba Shampiyona y’Isi y’Amagare izabera bwa mbere muri Afurika kuva tariki ya 21–28 Nzeri 2025.

Matteo yatangiye uru rugendo tariki ya 21 Kanama 2025, rumara hafi ukwezi mu muhanda, nk’uko abyivugira ari mu rukundo rukomeye rw’umukino w’amagare.

Ati:

“Nta mpamvu imwe gusa yaduteye gukora uru rugendo, ahubwo ni nyinshi. Iya mbere ni uko Shampiyona y’Isi igiye kuba bwa mbere muri Afurika, ibyo ubwabyo ni amateka. Byaduhaye amahirwe yo kunyura mu bihugu bitandukanye, tugahura n’imico y’ahandi nka Tanzania n’u Burundi.”

Uyu mugabo wakuze akunda cyane umukino w’amagare, yavuze ko uru rugendo rwabaye urw’inyigisho no kunezerwa ku muryango we.

“Ndi Umutaliyani, nkomoka mu gace k’abanyonzi. Kunyonga igare ni ikintu nkunda cyane, ni siporo ariko kandi bituma uhura n’abantu. Abana banjye na bo ntibabyumvaga mbere, ariko barabigerageje none barashoboye. Twese turishimye cyane.”

Yavuze ko urugendo rwanyuze mu misozi ikomeye cyane cyane mu Burundi no mu Rwanda, ariko akemeza ko imihanda yo mu Rwanda imeze neza kandi ashimira abahanga bayubaka.

Kuri ubu we n’umuryango we baritegura isiganwa rusange ry’abantu bose (Social Ride) rizaba ku wa 20 Nzeri 2025, umunsi umwe mbere y’uko Shampiyona itangira ku mugaragaro.