Kigali, 16 Nzeri 2025 – Abaholandi Megan Arens na Michiel Mouris ni bo begukanye imidali ya Zahabu mu cyiciro cy’abangavu n’ingimbi batarengeje imyaka 19, mu gusiganwa n’ibihe ku giti cyabo (Junior Individual Time Trial) muri Shampiyona y’Isi y’Amagare iri kubera i Kigali.
Abangavu: Megan Arens yegukanye Zahabu
Megan Arens, wakoresheje iminota 25’47” ku ntera ya kilometero 18.3, yahise yegukana umudali wa Zahabu mu cyiciro cy’abangavu.
Yakurikiwe n’Umunya-Espagne Paula Taco warushijwe amasegonda 35, atahana Ifeza, mu gihe Umunya-Noruvege Oda Aune yabaye uwa gatatu arushijwe amasegonda 37.
Umunyarwandakazi Masengesho Yvonne yasoreje ku mwanya wa 33 akoresheje iminota 29’43”, mu gihe Uwiringiyimana Liliane yabaye uwa 40 mu bakinnyi 47 basoje isiganwa.
Ingimbi: Mouris yandika amateka
Mu cyiciro cy’ingimbi, Umunyarwanda Byusa Pacifique ni we wabimburiye abandi gusohoka ku muhanda, akoresha iminota 34’34” ku ntera ya kilometero 22.6.
Nyuma, Umunya-Hollande Michiel Mouris yegukanye Zahabu akoresheje iminota 29’07” ku muvuduko wa kilometero 46.5/h.
Yakurikiwe n’Umunyamerika Ashlin Barry warushijwe amasegonda 6, mu gihe Umubiligi Van Kerckhove Seff yabaye uwa gatatu arushijwe amasegonda 8.
Abanyarwanda batagaragaje umusaruro wifuzwa: Byusa Pacifique yabaye uwa 53, yasizwe iminota 5’27”, mu gihe Ishimwe Brian yabaye uwa 55, asigwa iminota 5’52”.
Shampiyona irakomeje
Shampiyona y’Isi y’Amagare izakomeza kuri uyu wa Gatatu hakinwa Team Time Trial Mixed Relay, isiganwa ry’amakipe y’abagabo n’abagore ku ntera ya kilometero 41.8, guhera saa 13:45. Rizitabirwa n’abakinnyi 90 baturutse mu bihugu 19.
