Perezida wa Repubulika Paul Kagame yakiriye umuhuza washyizweho n’Umuryango wa Afurika Yunze Ubumwe ku kibazo cy’umutekano muke mu Burasirazuba bwa Repubulika Iharanira Demokarasi ya Congo, ari we Perezida w’Inama y’Abaminisitiri ya Togo, Faure Essozimna Gnassingbé.
Ibi biganiro byabereye muri Village Urugwiro kuri uyu wa Gatanu, byibanda ku isuzuma ry’uko umutekano wifashe mu Burasirazuba bwa RDC, ku ntambwe imaze guterwa mu biganiro bya dipolomasi byabaye mu bihe bishize, ndetse no ku ngamba zo gukomeza gushimangira imikoranire ihuriweho mu buhuza bwo ku rwego rw’akarere n’ubwo ku rwego rw’umugabane.
Abayobozi bombi baganiriye ku buryo inzira zitandukanye z’ubuhuza zakomeza guhuza imbaraga, hagamijwe kwirinda gusubiramo ibikorwa bya dipolomasi no kugera ku gisubizo gihamye ku makimbirane akomeje guhungabanya umutekano n’imibereho y’abaturage mu Burasirazuba bwa RDC.
Bashimangiye ko amahoro arambye mu karere k’Ibiyaga Bigari ashingira ku biganiro bya politiki, kubahiriza ubwigenge bw’ibihugu no gukorera hamwe kw’inzego z’akarere n’umugabane.
Nyuma y’ibiganiro byihariye, Perezida Kagame na Perezida Gnassingbé bahuye n’abagize Akanama k’Inzobere ka AU gashinzwe kunganira ubuhuza muri iki kibazo.
Muri aka kanama harimo:
-
Olusegun Obasanjo, wahoze ari Perezida wa Nigeria
-
Sahle-Work Zewde, wahoze ari Perezida wa Ethiopia
-
Festus Mogae, wahoze ayobora Botswana
-
Catherine Samba-Panza, wahoze ari Perezida wa Repubulika ya Centrafrique
Ibiganiro byabo byibanze ku guhuza no kunoza inzira z’ubuhuza zisanzwe, hagamijwe gushyiraho uburyo bumwe bufite icyerekezo gisobanutse bwo gukemura ikibazo cy’umutekano muke mu Burasirazuba bwa RDC.
Uru ruzinduko rwa Perezida Gnassingbé ruje mu gihe Umuryango wa Afurika Yunze Ubumwe ukomeje kongera imbaraga mu gushaka ibisubizo bya Afurika ku bibazo bya Afurika, cyane cyane mu karere k’Ibiyaga Bigari gakomeje guhura n’umutekano muke n’ihungabana ry’umubano hagati y’ibihugu.
Abayobozi bagaragaje ko gushyira hamwe kwa Afurika ari ingenzi mu gukemura amakimbirane, aho kwishingikiriza ku bisubizo bituruka hanze y’umugabane.
Perezida w’Inama y’Abaminisitiri ya Togo yageze mu Rwanda mu ijoro ryo ku wa 29 Mutarama 2026, mu ruzinduko rugamije gukomeza ibiganiro n’abayobozi batandukanye bo mu karere, ku kibazo cy’umutekano wa RDC n’uruhare rwa dipolomasi mu kugarura amahoro.
