Meya w’Umujyi wa Goma, Julien Ndalieni Katembo, yatangaje ko guhera kuri iyi tariki, icuruzwa ry’ibiyobyabwenge n’inzoga ziri mu macupa ari munsi ya mililitiro 300 ryaciwe burundu. Iki cyemezo cyafashwe n’ubuyobozi bw’ihuriro AFC/M23 ruri ku butegetsi muri Goma kuva muri Mutarama 2025.
Mu nama yagiranye n’abaturage, Meya Katembo yavuze ko iki cyemezo kigamije “kugarura agaciro ka Repubulika Iharanira Demokarasi ya Congo,” ahanini binyuze mu kurwanya imyitwarire ibangamira umutekano n’iterambere ry’urubyiruko.
“Ese tuzabasigira igihugu cy’abasinzi? Niba uzi ko ubonera ubuzima mu gucuruza urumogi, byihorere,” — Julien Katembo.
Uyu muyobozi yasobanuye ko inzoga yemewe ari ibikwa mu icupa rya pulasitiki kuva kuri mililitiro 300 kuzamura, agasaba ko inzoga zishyirwa mu masashi zicibwa burundu kuko “zitera imyitwarire mibi, cyane cyane mu rubyiruko ruri mu mashuri.”
Impamvu y’iki cyemezo RDC, cyane cyane Umujyi wa Goma, ifatwa nk’ahantu habonekamo cyane ibiyobyabwenge by’umwihariko urumogi, rimwe na rimwe binacuruzwa ku mugaragaro. Ibi bikunze guteza umutekano muke, ndetse bigakurura urugomo n’ubusinzi bukabije.
Kuva AFC/M23 yafata Goma, yashyize imbaraga mu bikorwa bigamije kugarura umutekano harimo n’ishakisha ry’intwaro zihishwe mu ngo. Iki cyemezo kirakomeza uwo murongo wo guhindura isura y’umujyi.
