Anneleen Van Bossuyt, Minisitiri ushinzwe impunzi n’abimukira mu Ububiligi, yatangaje ko umubare w’abasaba ubuhungiro baturuka muri Repubulika Iharanira Demokarasi ya Congo ukomeje kwiyongera ku buryo bushimishije.
Ibi yabivuze ku wa 13 Mata 2026, ubwo yatangizaga uruzinduko muri Repubulika Iharanira Demokarasi ya Congo, aho ateganya kuganira na Leta y’iki gihugu kuri iki kibazo cy’impunzi zikomeje kwiyongera.
Minisitiri Bossuyt yavuze ko mu mezi ashize Ububiligi bwahuye n’ubwiyongere bukabije bw’abasaba ubuhungiro baturuka muri RDC, agaragaza imibare igaragaza uko ikibazo kiri kwiyongera.
Yagize ati “Uyu mubare uri gutumbagira. Mu 2023 bari 1250, mu 2025 bagera kuri 2500. Mu mezi atatu ya mbere y’uyu mwaka bamaze kurenga 450. Aba ni benshi cyane.”
Yakomeje avuga ko abenshi mu basaba ubuhungiro baturuka i Kinshasa, ibintu yavuze ko bitera impungenge kuko uyu mujyi utabamo imirwano nk’iyibera mu burasirazuba bw’igihugu.
Uyu muyobozi yagaragaje ko hari abatanga amakuru atari yo kugira ngo bemererwe ubuhungiro, anaburira ko abazafatwa bazahura n’ingaruka zikomeye zirimo gufungwa cyangwa kwirukanwa mu Ububiligi.
Yagize ati “Abatanga amakuru atari yo bazatabwa muri yombi cyangwa birukanwe. Hari n’abazabaho mu buzima bugoye kuko batazemererwa gukora imirimo yemewe.”
Minisitiri Bossuyt yashimangiye ko hakenewe ubufatanye hagati ya Ububiligi na Repubulika Iharanira Demokarasi ya Congo mu gushaka ibisubizo birambye kuri iki kibazo, harimo no gukemura impamvu zituma abaturage bahunga igihugu cyabo.
Abasesenguzi bagaragaza ko ubwiyongere bw’impunzi ari ikibazo gikomeye ku Burayi, cyane cyane mu bihugu byakira umubare munini w’abasaba ubuhungiro, bigasaba politiki ihamye n’ubufatanye mpuzamahanga.
Leave a Reply