Mu Murenge wa Kimisagara hibutswe Jenoside yakorewe Abatutsi ku nshuro ya 32, aho hibanzwe ku mateka yihariye yaranze uyu murenge mu 1994.
Iki gikorwa cyo kwibuka cyitabiriwe n’abaturage, abayobozi ndetse n’abandi bashyitsi, bagaruka ku mateka agaragaza uko Jenoside yateguwe ikanashyirwa mu bikorwa muri aka gace.
Kimisagara ni umwe mu mirenge yo mu Karere ka Nyarugenge yagaragayemo ibikorwa bikomeye bya Jenoside yakorewe Abatutsi. Abatanze ubuhamya bagaragaje ubwicanyi ndengakamere bwahakorewe, ndetse n’uburyo Abatutsi bahigwaga umunsi ku wundi.
Bavuze ko hari ahantu henshi hiciwe abantu abatutsi benshi, abandi bagahunga bashaka uko barokoka, ariko bakomeza guhura n’ibitero by’abicanyi.
Abayobozi bagaragaje ko kwibuka Jenoside yakorewe Abatutsi mu 1994 ari umwanya wo kuzirikana amateka no gufata ingamba zo kwirinda ko ibyabaye byazongera kubaho.
Bashimangiye ko Abanyarwanda bakwiye gukomeza kubaka ubumwe n’ubwiyunge, bagaharanira kubaho mu mahoro no kwirinda ingengabitekerezo ya Jenoside.
Abaturage bitabiriye iki gikorwa bagaragaje ko kwibuka bibafasha gusobanukirwa amateka y’igihugu cyabo, bityo bagakomeza kurinda ibyagezweho.
Byongeye, basabwe gukomeza gufatanya mu bikorwa byubaka igihugu no guharanira ko Jenoside itazongera kubaho ukundi.
Leave a Reply